عَنْ عَائِشَةَ رَضِیَ اللَّهُ عَنْهَا، قَالَ رَسُولُ اللَّهِ صَلَّى اللهُ عَلَیْهِ وَسَلَّمَ: أُرِیتُكِ فِی المَنَامِ مَرَّتَیْنِ، إِذَا رَجُلٌ یَحْمِلُكِ فِی سَرَقَةِ حَرِیرٍ، فَیَقُولُ: هَذِهِ امْرَأَتُكَ، فَأَكْشِفُهَا فَإِذَا هِیَ أَنْتِ، فَأَقُولُ: إِنْ یَكُنْ هَذَا مِنْ عِنْدِ اللَّهِ یُمْضِهِ
ام المومنین سیدہ عائشہ صدیقہ رضی اللہ عنہا سے مروی ہے رسول اللہ صلی اللہ علیہ وسلم نے دومرتبہ خواب میں عائشہ صدیقہ رضی اللہ عنہا کودیکھاکہ وہ ریشمی کپڑوں میں لپٹی ہوئی ہیں اورکوئی انہیں گودمیں اٹھا کر کہتا ہے کہ یہ آپ کی زوجہ ہیں جب آپ کپڑاہٹاکر دیکھتے تووہ عائشہ رضی اللہ عنہا بنت ابی بکرتھیں ، رسول اللہ صلی اللہ علیہ وسلم فرماتے تھے اگریہ اللہ کی طرف سے ہے توایساہوجائے گا۔ [1]
عَنْ عُرْوَةَ، أَنَّ النَّبِیَّ صَلَّى اللهُ عَلَیْهِ وَسَلَّمَ خَطَبَ عَائِشَةَ إِلَى أَبِی بَكْرٍ، فَقَالَ لَهُ أَبُو بَكْرٍ: إِنَّمَا أَنَا أَخُوكَ، فَقَالَ:أَنْتَ أَخِی فِی دِینِ اللَّهِ وَكِتَابِهِ، وَهِیَ لِی حَلاَلٌ
عروہ رضی اللہ عنہ سے مروی ہے چنانچہ اللہ تعالیٰ کے اس اشارے پرنبی کریم صلی اللہ علیہ وسلم نے سیدنا ابوبکر رضی اللہ عنہ کوسیدہ عائشہ صدیقہ رضی اللہ عنہا سے نکاح کاپیغام بھیجا، سیدنا ابوبکر رضی اللہ عنہ نے عرض کیااے اللہ کے رسول صلی اللہ علیہ وسلم میں توآپ کابھائی ہوں ، آپ صلی اللہ علیہ وسلم نے فرمایااسلام کے رشتے سے تم میرے دینی بھائی ضرور ہو مگرحقیقی بھائی نہیں ہواس لئے وہ میرے لئے حلال ہے (کہ میں ان سے نکاح کرلوں )۔ [2]
سیدنا ابوبکرصدیق رضی اللہ عنہ نے اس نکاح کوپسندکرلیا
تَزَوَّجَنِی رَسُولُ اللهِ صَلَّى اللهُ عَلَیْهِ وَسَلَّمَ فِی شَوَّالٍ
اور ماہ شوال بارہ بعثت نبوی کورسول اللہ صلی اللہ علیہ وسلم کانکاح عائشہ صدیقہ رضی اللہ عنہا سے ہوگیا۔ [3]
یعنی ماہ شوال میں عقداورزفاف مستحب اورمبارک ہے جواسے منحوس سمجھتے ہیں وہ جاہلیت کے عقیدہ پرقائم ہیں ۔
ان کاحق المہرپانچ سودرہم مقررکیا گیا۔
عَنْ أَبِی سَلَمَةَ بْنِ عَبْدِ الرَّحْمَنِ، أَنَّهُ قَالَ:سَأَلْتُ عَائِشَةَ زَوْجَ النَّبِیِّ صَلَّى اللهُ عَلَیْهِ وَسَلَّمَ: كَمْ كَانَ صَدَاقُ رَسُولِ اللهِ صَلَّى اللهُ عَلَیْهِ وَسَلَّمَ؟ قَالَتْ: كَانَ صَدَاقُهُ لِأَزْوَاجِهِ ثِنْتَیْ عَشْرَةَ أُوقِیَّةً وَنَشًّا، قَالَتْ:أَتَدْرِی مَا النَّشُّ؟ قَالَ: قُلْتُ: لَا، قَالَتْ:نِصْفُ أُوقِیَّةٍ، فَتِلْكَ خَمْسُمِائَةِ دِرْهَمٍ، فَهَذَا صَدَاقُ رَسُولِ اللهِ صَلَّى اللهُ عَلَیْهِ وَسَلَّمَ لِأَزْوَاجِهِ
ابوسلمہ بن عبدالرحمٰن کہتے ہیں میں نے عائشہ صدیقہ رضی اللہ عنہا سے پوچھا کہ نبی کریم صلی اللہ علیہ وسلم نے اپنی ازواج کو کتنا کتنا مہر دیا؟ انہوں نے فرمایا کہ نبی کریم صلی اللہ علیہ وسلم نے اپنی ازواج (میں سے ہر ایک) کو بارہ اوقیہ اور ایک نش دیا تھا تم جانتے ہونش کیا ہوتاہے ؟ میں نے عرض کیا نہیں ، ا نہوں نے فرمایا نصف اوقیہ، یہ کل پانچ سو درہم بنتے ہیں اور یہ ہے وہ مہر جو رسول اللہ صلی اللہ علیہ وسلم نے اپنی ازواج مطہرات کو دیا تھا۔ [4]
عَنْ عَائِشَةَ رَضِیَ اللَّهُ عَنْهَا:أَنَّ النَّبِیَّ صَلَّى اللهُ عَلَیْهِ وَسَلَّمَ تَزَوَّجَهَا وَهِیَ بِنْتُ سِتِّ سِنِینَ، وَأُدْخِلَتْ عَلَیْهِ وَهِیَ بِنْتُ تِسْعٍ
ام المومنین عائشہ صدیقہ رضی اللہ عنہا فرماتی ہیں جب نبی کریم صلی اللہ علیہ وسلم نے نکاح کیا تو اس وقت میری عمرچھ سال تھی(کیونکہ ابھی عمرکم تھی اس لئے رخصتی عمل میں نہیں آئی)اورجب میں نو سال کی ہوئی تو مجھ سے خلوت کی گئی۔ [5]